Luk 20 | WSK | STEP | Tom bo Jesus temple ningi kariimet den gilalong yawara apukaso ale nunga kasuruwa, priest bibiya se Law Den ko kausa kari se kari supuling saki nukote taiman ale nu isarman,

Luke 20

Kari bibiya Jesus isarman, “Awiri ura kisam a?” maman

(Mat 21:23-27; Mark 11:27-33)

1 Tom bo Jesus temple ningi kariimet den gilalong yawara apukaso ale nunga kasuruwa, priest bibiya se Law Den ko kausa kari se kari supuling saki nukote taiman ale nu isarman, 2 “Kari awiriya balam se ni ura mel suen biya imi betesam wore balu se ikinakko.”

3 Se nu nunga den koma iwita balam, “Se ani betela isa bo ningarsam: 4 John kariimet nunga anukaso mu Kaem balam se agi, kari balman se ura mu bitakaso, wore balal se ani ikiekko.”

5 Se nuna nongota nunumi ago den tagikasan ale balukasan, “Se ana balnak, ‘Kaem balam se,’ ma balnak, mu nu baluk, ‘Se awuk se nina John ko den ko nengemang ningi nunguning mena ya?’ maukkowo. 6 Se aking ana balnak, ‘Mu kariimet balman,’ manak, mu imikiri manga te nanga usagomon se kuenakkowo, mu awuk, nononga nongomang ningi nunguning mu John mu prophet ma balsan.” 7 Nuna uwutata ikiwa se, aking Jesus ko den koma iwita manorman, “Awiriya balam se John ura mu bitakaso mu ana me ko ikisan,” maman.

8 Se Jesus nunga maonam, “Buta se ani betela kari awiriya balam se ani ura bitawasam imi mu balik se nina me ikialko.”

Kari memek waen ningam bitarukasan wore nunga den ira

(Mat 21:33-46; Mark 12:1-12)

9 Aking Jesus den ira imi kariimet nunga maonam: “Kari bo waen ningam nungam, ale nu ningam mu kari sang nuguting te bitarmonko beteram, nuna te nunga manga ura bita se bagomonko. Ale nu kota sor bo te namaram ale kam maiya biya lagakaso. 10 Se waen nunguning gia ko tom tai aratam, mu nu ko ura kari bo maonam se kari ningam bitarungaman mu nongote namaram, waen nunguning sang gi tumon se karogo tai nu tuokko. Bare nuna ura kari mu iluman moman, ale karoman se ipi peleram namaram. 11 Se aking ura kari bo beteram se namaram, mu betelatala moa maguwuman ale karoman se ipi peleram namaram. 12 Se akingtala ura kari bo beteram se namaram. Bare betelatala nuna ninguru moa maguwuman ale patowaman ningam ko kar buring ko sapaman.

13 “Se ningam kotam balam, ‘Ani pa awuk maikko ya? Aninga kuriang kari angamang motam tusam umutang ani bitirik se namurukko. Nuna noko kuring ikimonko agi?’

14 “Bare ningam bitua kari alo, noko namar umutang taiwaram se aringiman, ale nongota nunumi manorman, ‘Kari imi maingte nuet ko mel suen la giokkowo! Aria, monak se kueruk, se ana nangata ali imi tanakko!’ maman. 15 Ale iluman ningam buring ko sapaman ale moman se kueram.”

Jesus buta balam asele nunga maonam, “Se ningam ko kotam mu ningam bitua kari awuk arungak bitirukko ya? 16 Mu nu tairuk ale kari ningam ZZZ bitaruwaman mu nunga moruk se kua sapomonko! Se nu ningam umu kari sang nuguting te bitirukko.”

Se kariimet den mu ikiman ale balman, “Aa, nu buta me bitirukko agila!”

17 Bare Jesus nungarkam ale balam, “Se den imi Kaem ko batoga te aniso mu ko nunguning awuk a? Den iwita balso,

‘Manga bo, kawam kaola kari alo memek ma balman,
mu manga borta kawam giwoso.’ ^{▼▼Luke 20:17 Psalm 118:22.}
18 Se kari manga mu te dagulomon, mu batuwutuk ma sapomonko. Se manga mu kari bo awete dagulok, mu kari mu bunetutuk arukkowo.”

19 Se Law Den ko kausa kari se priest bibiya mu nuna ikiman Jesus den mu nuna te ikimonko nunga atumu iram ale balukaso. Buta se tom mu te la nu ilumonko kaeyakasan, bare nuna kariimet nunga nguangakasan ale me iluman.

Nuna Caesar takis tumonko agi mena wore ko Jesus isarman

(Mat 22:15-22; Mark 12:13-17)

20 Nuna Jesus ilumonko se ninguru arikuawuwakasan, nuna nu den sang balu paguwurok se ikimon ale nu te ilumon ale Rome supuling nunga sor bitaruwara wore ko kuting te betemonko. Buta se nuna kari sang nunga manorman se Jesus tugurukasan. Kari mu nuna kawel kari, bare nuna kariimet nomotam te kari diram ko nunumi bitakasan. 21 Nuna Jesus manorman, “Kausa kari,” maman, “ana nika ikisan, nika den mu nunguning tala balsam. Ni kari nup ago mu den bo kilimik tusam ale kari nup mena mu den bo kilimik me tusam. Mena. Ni Kaem ko den kariimet nunga kasursam mu diram la nunga kasursam. 22 Buta se ni awuk ikisam? Ana ali supuling Caesar takis tunak agi mena? Munan awuk bore terong?”

23 Bare Jesus nuna nu kulurukasan mu nu maingkala ikiam. 24 Buta se nu nunga maonam, “Manga silver bo tal ale tai aga kausal se arigekko.” Se nuna manga bo ago tai tuman, se nu tam ale nunga isuam, “Se manga kumik te mu awiri ko dora se ko nup aniso ya?”

Se nuna balman, “Caesar ko,” maman.

25 Se Jesus nunga maonam, “Buta mu Caesar ko mel mu eng Caesar tualko. Se Kaem ko mel mu eng Kaem tualko.”

26 Buta se kariimet nomotam te nuna noko den te kulurmonko me terong. Nuna den koma nu balu nungaram wore ko biririkiman ale ko nungamin yenakaso, se am kawus maman.

Nuna kuera ale barasa ko munan wore ko Jesus isarman

(Mat 22:23-33; Mark 12:18-27)

27 Sadducee kari saki Jesus kote taiman. Mu nunga bala te mu iwita, kariimet kuesan mu tom nukum te me barasomonko ma gilingisan. 28 Se umutang ko, nunga kari sang taiman ale Jesus isarman, “Kausa kari,” maman, “Moses munan den bo iwita bataguru nangaram: Kari bo imet tauk ale kuriang mena am baga kueruk, mu noko uria aking kari mu ko imet gerewa mu tauk, se laun kueram mu ko nup te kuriang aratomonko.

29 “Butata se launuria 7 bagakasan. Se laun mu imet tam ale kuriang mena baga nu kueram. 30 Se ko uria kowom kaora imet umutang tala tam, bare betela kuriang mena baga nu kueram. 31 Se aking bo kowom kaora tala mu imet mu tam, bare betelatala kuriang mena baga nu kueram. Butata tala, nuna launuria 7 la imet mu ilak bagakasan, bare nu kuriang bo me ilu nungaram, nuna la kua sapaman. 32 Asele udagi te imet mu betela kueram. 33 Butata se tom kariimet kuera mu barasomonko tom te, mu imet umutang mu kari awuk mu ko nuwus bagurukko? Launuria 7 mu nunga nunuwus imet suwanta umutang!”

34 Se Jesus nunga maonam, “Tom imi te kariimet nuna nunumi awusan. 35 Bare kariimet Kaem ningo diram nunga baluk, ale nunga amumok se barasomonko tom mu te, nuna nuwus-kuari ko munan te me bagomonko. 36 Nuna udagi me kuemonko, mena, nuna engel alo bagasan wore nunga iwita tom suen biya bagomonko. Kaem nunga amumok se barasomon ale nuna noko kuriang ko bagomonko.

37 “Moses ko batoga te kariimet kueman mu barasomonko den ago nanga kasurso. Mu awuk, nu tama bo, tam gawa kower ningi kaniwakaso, bare tam umu me kanikaso mu ko dugu duap balu se Kaem ko iwita balso, nu Abraham ko Kaem, Isaac ko Kaem, se Jacob ko Kaem, maso. ^{▼▼Luke 20:37 Moses ko den: Exodus 3:6.} 38 Se den mu te nina am iwita ikialko, kariimet kueman wore Kaem mu nuna kueman iwita me nunga ikiwoso, nuna suen la marak bagasan wore iwita nunga ikiwoso.”

39 Jesus iwita balam se Law Den ko kausa kari sikina nu manorman, “Kausa kari, ni yawarakala balem!” maman. 40 Ale udagi te nuna isa sang agotala tumonko mu nguangakasan.

Kristus mu King David ko Biya

(Mat 22:41-46; Mark 12:35-37)

41 Se Jesus nunga maonam, “Awuk se nuna balsan Kristus mu David ko kuriang ma balsan? 42 David kota Psalm ko batoga te iwita balam:

‘Kaem aninga Kari Biya iwita maonam:
Ni aninga agiting sengam mu te dagi sager,
43 se ani kari nikerak kagersan mu nunga gi ka siwik duap ningi nunga awurekko ma balam.’ ^{▼▼Luke 20:42-43 David ko den: Psalm 110:1.}
44 David kota Kristus ko balam noko Kari Biya mam. Se awuk ta aking noko kuriang?”

Law Den ko kausa kari nunga bagara aolak

(Mat 23:1-36; Mark 12:38-40; Luke 11:37-54)

45 Kariimet suen la am baga se Jesus ko den ikiwakasan. Se nu ko olekem nunga maonam, 46 “Nina Law Den ko kausa kari nunga sinar talko! Nuna guang maiya maiya katomon ale biguwura kuwim te kariimet ningi aolak ilumon geragomon se kariimet nunup patawomon amilmil nungarmonko ninguru ko kuesan. Ale nuna synagogue ningi kariimet nomokete gira dagimonko ninguru kua gilingisan. Ale na yu biya betera ko kam te betela kuwim nup ago wore te la dagimonko kuesan. 47 Ale imet gerewa nugari kueman wore nunga kulursan ale nunga kawel te nunga kawam melmasak tere gisan. Ale kawelasan kariimet nomokete Kaem aru ngatanga kopa maiya biya betesan. Buta se nuna kawel koma memek biyala nunguningkiri tamonko.”